Од 7. по 13. марец на Новосадским сайму будзе отримани Медзинародним саям кнїжкох, а на нїм буду представени и виданя на руским язику – Заводу за културу войводянских Руснацох, НВУ „Руске слово” и Дружтва за руски язик, литературу и културу.
Промоция нових публикацийох Завода за културу войводянских Руснацох будзе на штварток, 9. марца од 14 годзин на главней бини у Мастер гали, а у фокусу будзе „Анґлийско-руски словнїк” проф. др Михайла Фейси.
Потим, на 14:30 годзин отрима ше представянє актуалних белетристичних насловох НВУ „Руске слово”. Дружтво за руски язик, литературу и културу свойо виданя на Сайму представи на соботу, 11. марца, у рамикох наступа Координацийного одбора дружтвох за язики, литературу и културу.
Попри Сайма кнїжкох источашнє будзе отримана и Медзинародна вистава уметносци „АРТ ЕКСПО”, як и Медзинародни саям образованя „Драгокази” хтори будзе тирвац од 9. по 10. марец. Роботни час Новосадского сайму од 10 по 20 годзин, а през викенд Саям будзе отворени по 21 годзин. Уход на шицки три манифестациї будзе безплатни.
