Наша робота, медзи иншим, облапя и очуванє културного скарбу Руснацох у Войводини, та предмети, дарунки и леґати хтори доставаме од числених поєдинцох окреме значни за витворенє того цилю. Вони тиж оможлївюю дальши виглєдованя и толмаченя, понеже су, у складзе зоз предписанями, доступни виглєдовачом и науковцом, а резултати їх виглєдованьох презентуєме ширшей явносци пре промоцию националного идентитету Руснацох. Часц тих материялох диґитализовани и кажди дзень ше роби на оможлївйованю приступу тим материялом, а часц чека свой шор за диґитализацию.
З тей нагоди жадаме подзековац шицким приятельом и почитовательом нашей установи хтори зоз своїма дарунками помогли дїялносц Заводу за културу войводянских Руснацох.
Завод за културу войводянских Руснацох найсердечнєйше дзекує Мариї Жирош, супруги и Анамариї, дзивки Мирона Жироша на подарованих кнїжкох, рукописох, фотоґрафийох и инших електронских записох.
Зоз контрактом о дарунку, Владимир Скубан подаровал Заводу кнїжку “Кухарка” зоз 1938. року, а дзекуєме и на поштредованю зоз панї Свитлану Матисен зоз Нємецкей, хтора даровала рукопис “Страсци Исуса Христа” автора Михала Гербута з периоду 1880. року. Дзекуєме панї Матисен на добрей дзеки и довирию.
Вельку подзековносц длужни зме и гражданом хтори за библиотеку у Заводзе видвоєли часц своїх кнїжкох же би ше звекшал наш фонд. Сердечно дзекуємє: Олґи Карлаварис, Анамариї Сабол, Миронови Павловичови, Йовґенови Мудрому, Маринкови Дудашови, др Елеи Г. Каменїцки.
Вельке число гражданох одволало ше на акцию збераня приватних документох и старих фотоґрафийох: културно-историйней документациї хтора шведочи о каждодньовим и вирским живоце Руснацох на просторе Бачкей, Сриму и Славониї. Наисце зме подзековни шицким хтори ше одволали.
