Завод за културу войводянских Руснацох хвильково дзелї просториї зоз НВУ „Руске слово”. Медзитим, то би ше пошвидко мало пременїц.
Плановане же би хижа у Улїци Матици сербскей 15 у Новим Садзе, о даскельо мешаци постала нове шедзиско Завода. Роботи на адаптациї будинку почали концом марца прешлого року, а того априла би мали буц закончени и будинок би требал буц шветочно отворени.
У новим простору Завод будзе мац коло 240 квадратни метери простору за хаснованє. Окрем канцеларийох, адаптовани и пиньвица и пойд хтори спрам идейних ришеньох буду вецей як идеални и за отримованє културних манифестацийох.
Финансийни средства за адаптацию будинку обезпечела Покраїнска влада и Национални совит Руснацох. Тиж так, Покраїнска влада указала порихтаносц обезпечиц и додатни средства за менши роботи вязани за ушоренє вонкашнього простору. Термин за реализацию достатих средствох од Покраїнскей влади 3. април того року.
