На тогорочним Сайму кнїжкох у Беоґраду, 26. октобра, представени и кнїжки по руски.
![Фото: Вероника Ву](https://zavod.rs/wp-content/uploads/2022/10/2022-10-26-BG-Sajam-knjizkoh-W-39-ZKVR.jpg)
Завод за културу войводянских Руснацох представел моноґрафию „Руски Керестур – Живот и обичаї Руснацох у обєктиве фотоґрафох Будински” др Миряни Дєкич, „Правопис руского язика з правописним словнїком” проф. др Михайла Фейси и мр Гелени Медєши и „Зборнїк роботох зоз Пиятей рускей науковей конференциї за студентох, младих науковцох и фаховцох” чий редактор Саша Сабадош.
Бешедуюци о моноґрафиї „Руски Керестур – Живот и обичаї Руснацох у обєктиве фотоґрафох Будински”, Сабадош визначел же проєкт диґитализованя фото-плочох виробених у студию фамелиї Будински предлужени, та найскорей ушлїдзи и други том Моноґрафиї. О кнїжки „Правопис руского язика з правописним словнїком” бешедовала єй коавторка, хтора потолковала як ше одвивал процес роботи на тим значним виданю.
![](https://zavod.rs/wp-content/uploads/2022/10/2022-10-26-BG-Sajam-knjizkoh-W-42-ZKVR.jpg)
О публикациї „Зборнїк роботох зоз Пиятей рускей науковей конференциї за студентох, младих науковцох и фаховцох” чийо совидавателє Завод за културу войводянских Руснацох, НВУ „Руске слово”, Оддзелєнє за русинистику Филозофского факултету и нєформалне здруженє Виглєдовацки круг, вєдно бешедовали директор Заводу Саша Сабадош и директор НВУ „Руске слово” др Борис Варґа. З тей нагоди наявели шлїдуюцу, Шесту руску наукову конференцию за студентох, младих науковцох и фаховцох, хтора планована за 2023. рок.