У просторийох Заводу за културу войводянских Руснацох отворена вистава фотоґрафийох младей уметнїци Марияни Павлович з Руского Керестура. Часц приказаних фотоґрафийох находза ше и у кнїжки фотоґрафийох Марияни Павлович „Проблеми” („МАК”, 2014), док друга часц фотоґрафийох перши раз приказана на вчерайшей вистави.
Виставу отворела редакторка часопису „МАК” Мая Зазуляк, котра привитала нащивительох и пречитала виривок з рецензиї хтору написал Борис Кочиш за кнїжку „Проблеми”.
Авторка Марияна Павлович представела свойо фотоґрафиї и подзековала Заводу за културу войводянских Руснацох и часопису „МАК” же оможлївели кнїжку и виставу.
Директор Заводу за културу войводянских Руснацох Серґей Тамаш гварел же ше з виставу символично означує и седемрочнїцу роботи Заводу и з тей нагоди повинчовал авторки на отвераню уметнїцкей вистави и привитал креативносц и иновативносц младих. Тамаш наглашел же Завод предлужи потримовац шицки сеґменти културней политики Руснацох, окреме младих.
