На отриманей штвартей схадзки Националного совиту єдногласно прилапени Финансийни звит и План роботи за 2014. рок Заводу за културу войводянских Руснацох.
На початку схадзки, при прилапйованю записнїкох зоз скорейших схадзкох НС Мирон Сабадош зауважел же ше план роботи и финансийни план Заводу за 2015. рок прилапйовало на електронскей схадзки Совиту, а Юлиян Ковач же ше исти прилапйовало на електронскей схадзки Управного одбору (УО) Заводу. Як потолковал директор Заводу Серґей Тамаш, плани пред тим детально вианализовани на порядней схадзки УО децембра мешаца 2014. року, а електронски су прилапйовани пре цо ефикаснєйше доставанє средствох од финансиєра Покраїни, як цо то наглашел и сам предсидатель НС Славко Рац.
Перши чловек Националного совиту и на писмено предочел же перши средства до Заводу того року сцигли уж 13. марца, прешлого року то було 10. марца, а 2013. року 9. априла, дзекуюци ефикаснєйшому доручованю планох финансиєрови. Винєсол же од 2010. по 2012. рок перши средства Заводу сциговали аж початком, лєбо концом юния.
Бешедуюци о звитох, Тамаш визначел вецей проєкти, медзи нїма же прешлого року почало витворйованє идеї о прекладаню литературних творох наших авторох на странски язики, же у окремней едициї почало обявйованє мастер-роботох наших студентох, а афирмованє роботи младих и далєй будзе єдно з главних опредзелєньох. И Тамаш и дзепоєдни члени Совиту визначели добре сотруднїцтво Заводу зоз шицкима нашима институциями, та и другима заводами, а як гварел директор Заводу – тота институция достава тренд елитней рускей културней установи на ширшим уровню, як професийним, так и аматерским.
Єдногласно прилапена Одлука о местох отримаваня Централних преславох Националного швета Руснацох од 2016. по 2018 рок: Кула (2016), Бикич Дол (2017) и Суботица (2018).
