ЗКВР у сотруднїцтве зоз партнерскима институциями розпочал процес ревизиї Музейней збирки у Руским Керестуре, хтори облапя пописованє постояцих експонатох и єй дополньованє з новима.
Поволуєме шицких гражданох хтори сцу участвовац у процесу чуваня културного и историйного скарбу войводянских Руснацох же би Збирки подаровали предмети шлїдуюцей форми:
- Артефакти етноґрафскей природи хтори настали скорей Другей шветовей войни (мебель, народне облєчиво и текстил, орудиє и други предмети хасновани у привреди);
- Фотоґрафиї хтори настали по 1945. рок каждей файти як и фотоґрафиї настали после того року, а одноша ше на значни дружтвени, привредни и културни подїї у руским народзе;
- Преписка и други документи на руским язику лєбо на других язикох хтора ма значенє за историю Руснацох на тих просторох;
- Рукописни кнїжки на руским язику;
- Друковани кнїжки и преса на руским язику настали по 1945. рок.
Надпоминаме же ше тота поволанка нє одноши лєм на предмети чийо походзенє з Руского Керестура, алє на предмети вязани за живот и дїялносц Руснацох на цалокупним просторе Сербиї и бувшей Югославиї.
Шицки заинтересовани дародавателє можу ше явиц на число телефона 0216546534 и на и-мейл адресу zavod.rusini@gmail.com прейґ хторих ше годно догвариц коло детальох.
