Єдна з найзначнєйших активносцох и способох за очуванє, моцнєнє и презентованє националного идентитета Руснацох преслава Националного швета Руснацох у Сербиї.
Завод главни орґанизатор Централней преслави, а кажди рок ше тота преслава отримує у другим месце у котрим жию Руснаци.
През змистово богату културно-уметнїцку програму визначуєме гевто цо найквалитетнєйше и найрепрезентативнєйше у явним живоце Руснацох на тих просторох, з акцентом на окремносц рускей заєднїци у месце у котрим ше отримує шветочносц.
Од 2012. року у рамикох означованя Швета почали ше видавац и моноґрафиї о културно-просвитних, дружтвених, историйних, релиґийних, уметнїцких и других информацийох о Руснацох у тим месце.
Кажди рок ше руска заєднїца представи и з уметнїками и їх творами, богатим етно-столом, на котрим представени ручни роботи и руска кухня, як и з музичарами, шпивачами и рецитаторами. По тераз Централна шветочносц и провадзаци програми отримани у:
- 2009 – Нови Сад
- 2010 – Шид
- 2011 – Коцур
- 2012 – Дюрдьов
- 2013 – Сримска Митровица
- 2014 – Нове Орахово
- 2015 – Вербас
- 2016 – Кула
- 2017 – Бикич Дол
- 2018 – Суботица
- 2019 – Руски Керестур
