Каждого 17. януара, Руснаци у Сербиї преславюю свойо Националне швето – як здогадованє на дзень кед 1751. року совитнїк царици Мариї Терезиї и администратор Кральовско-державного Бачкого дистрикту у Зомборе Франц Йозеф де Редл подписал перши урядови документ – Контракт о насельованю 200 руских грекокатолїцких фамелийох на тедишню пусту Вельки Керестур.
Тот дзень уж вецей децениї прилапени як дзень урядового досельованя Руснацох на тоти простори, гоч, спрам историйних жридлох, перши доселєнци-Руснаци з Горнїци у меншим чишлє ту пришли коло 1745. року.
Єдна з найзначнєйших активносцох и способох за очуванє, моцнєнє и презентованє националного идентитета Руснацох преслава Националного швета Руснацох у Сербиї. Завод за културу войводянских Руснацох главни орґанизатор Централней преслави, а велька потримовка му локални културно-уметнїцки друштва, општини и инши орґанизациї и институциї.
През змистово богату културно-уметнїцку програму визначуєме гевто цо найквалитетнєйше и найрепрезентативнєйше у явним живоце Руснацох на тих просторох, з акцентом на окремносц рускей заєднїци у месце у котрим ше отримує шветочносц.
Одлуку о датуму Националного швета Руснацох у Сербиї, як и о других националних символох – гербу и застави, принєсло друге зволанє Националного совиту (НС) Руснацох у априлу 2007. року. Одлуку о шветочней шпиванки Руснацох у Сербиї „Браца Русини” принєсло треце зволанє НС 2010. року, а спомнути одлуки принєшени на основи Закона о защити правох и шлєбодох националних меншинох у Сербиї. Перша Централна шветочносц з нагоди швета отримана у януаре 2008. року у Новим Садзе, а потим ше ю кажди рок отримовало у другим месце.
Кажди рок ше руска заєднїца представи и з уметнїками и їх творами, богатим етно-столом, на котрим представени ручни роботи и руска кухня, як и з музичарами, шпивачами и рецитаторами. По тераз Централна шветочносц и провадзаци програми отримани у:
- 2008 – Нови Сад
- 2009 – Руски Керестур
- 2010 – Шид
- 2011 – Коцур
- 2012 – Дюрдьов
- 2013 – Сримска Митровица
- 2014 – Нове Орахово
- 2015 – Вербас
- 2016 – Кула
- 2017 – Бикич Дол
- 2018 – Суботица
- 2019 – Руски Керестур
- 2020 – Шид
- 2021 – Нови Сад
