Покля провадзацу програму могло видзиц у Коцуре, месту тогорочних домашнїх, Шветочна академия з нагоди Националного швета Руснацох отримана, 21. януара у Вербаше у Биоскопу „Югославия”.
Шветочносц отворена з виводзеньом гимни Републики Сербиї „Боже правде” и шветочней шпиванки „Браца Русини” чий автор Коцурец, Ириней Тимко. Потим ше женска жридлова шпивацка ґрупа, хтору пририхтує Агнета Тимко Мудри представела зоз шпиванку „Нє пий коню воду” у провадзеню оркестра Културно-просвитного дружтва „Карпати” и Културно-уметнїцкого дружтва „Жатва”. Леґиньска шпивацка ґрупа зоз Руского Керестура одшпивала „Кед я ишол попод гумна” у акапела верзиї, а зоз стихами писнї „Лїк за мацер” Дюри Папгаргая, представел ше Мирослав Малацко.
Дарина Михняк виведла шпиванку „Крочаї милого” за хтору музику и текст написала Агнета Тимко Мудри. Мишана шпивацка ґрупа потим виведла шпиванку „Мила моя мамко”. Потим штири найкрасши коцурски гласи – Саня Дивлякович, Мирела Тимко, Танита Ходак и Дарина Михняк з провадзеньом членох шпивацких ґрупох Културно-уметнїцкого дружтва „Жатва” вєдно одшпивали шпиванку „Писня Коцуру” за хтору текст и музику написал Любомир Загорянски, а у ориґиналним виводзеню одшпивал Михал Иван.
Национални оркестер у камерним составе чий руководитель Мирослав Пап, на програми виведол вецей композициї – „Швита глас и диждж”, вец „Три руски мелодиї” та и на концу програми композицию „З давен давна”. Шветочносц пририхтали Орґанизацийни одбор Централней шветочносци, Завод за културу войводянских Руснацох и Национални совит Руснацох зоз потримовку Општини Вербас, Културно-уметнїцкого дружтва „Жатва” и Радио-телевизиї Войводини, а дзекуюци финансийней потримовки Покраїнского секретарияту за културу, явне информованє и одношеня з вирскима заєднїцами. Водителє през програму водителє були Доротеа Будински и Андрей Орос.
