З нагоди отримованя Медзиокружного змаганя з руского язика и язичней култури за школярох основних школох хторе ше отримало у Основней школи Йован Йованович Змай, директор Заводу за културу войводянских Руснацох мр Серґей Тамаш роботно нащивел Дюрдьов. У розгварки зоз директорку школи Марию Киш Тртич, присутнима наставнїками, професорами руского язика як и виховательками, централна тема розгварки бул актуални стан и проблеми зоз хторима ше стретаю присутни кед у питаню упис дзецох, гашенє одзелєньох як и можлїви способи у хторим напряму далєй заєднїцки роботно дїйствовац же би ше тото за нашу руску националну заєднїцу стратеґийне – важнє питанє злєпшало и ришовало.
Директор вихасновал нагоду уручиц єдно од капиталних виданьох самого Заводу «Червене пупче 1969-2012, Нова музична творчосц за дзеци, треци том» нашим наставнїцом: Олї Яковлєв (Нови Сад), Ана Мариї Рац (Нови Сад), Марии Стрибер (Кула), Славици Мали (Вербас) и Златици Сивч Здравич (Бачинци/Бикич/Шид).
Тото цо значне наглашиц же на самим змаганю учасц вжали понад 70 школяре, од пиятей по осму класу зоз 19 школох, односно13 местох дзе ше на даяки способ виучує наш руски язик.
После змагананя, була отримана промоция Ґимназиї “Петро Кузмяк», єй руского оддзелєня, односно штреднєй школи у Руским Керестуре. Сама промоция отримана як початок промо кампанї уписованя школярох з наших местох до єдиней нашей штреднєй школи на руским язике у тей часци Европи. Промоцию отримали директорка школи Хелена Пашо Павлович, Желько Ковач, предсидатель Вивершного одбору Националного совиту и Мелания Римар, предсидателька Одбору за образованє Националного совиту. Промоция орґанизована после спомнутого змаганя праве вихасновац присуство найлєпших школярох з наших местох дзе ше виучує руски язик, а котри би могли буц потенциялни школяре керестурскей Ґимназиї.
Медзиокружне змаганє з руского язика и язичней култури орґанизовало Министерство просвити, науки и технолоґийного розвою, Дружтво за руски язик, литературу и културу и ОШ „Йован Йованович Змай” у Дюрдьове.
