Пре рестриктивни буджет за 2016. рок, у наяви финансийно буду загрожени традицийни проєкти културно-уметнїцких дружтвох, установох култури и професийни театри, медзи нїма Завод за културу войводянских Руснацох як и Руски народни театер.
На основи запланованих средствох з буджету АП Войводини за 2016. рок, а за дїялносц Заводох за културу войводянских Руснацох опредзелєни средства у виносу од 5.830.000,00 дин цо фактично значи же буджет за тот актуални 2016. рок по першираз зменшани за 770.000,00 цо ше рефлектує на зменшани осяг активносцох з нука Заводу.
Як наглашел Славиша Ґруїч, покраїнски секретар за културу и явне информованє, за потримовку и стимулацию сучасней културней творчосци меншинских заєднїцох того року буду наменєни 2,5 милиони динари, а прешлого року то було вєдно 20 милиони динари.
Як гварел Ґруїч, того року за софинансованє програмох и проєктох на основи явного конкурсу Секретарият розполага зоз 42,7 милиони динари, цо аж шейсц раз менєй як прешлого року.
Без финансийней потимовки Покраїни того року вироятнє останю фестивали и манифестациї як цо то „Еґзит”, „Стерийово позорє”, „Шекспир фест” Фестивал професийних театрох Войводини и други.
Обласц информованя тиж будзе очкодована пре зменшани буджет, а як гварел покраїнски секретар, найвецей буду церпиц литературна, музична, сценска и филмска творчосц, та манифестациї.
Славиша Ґруїч гварел же средства зменшани зрозмирно другим ресором у Покраїнскей влади, алє же заш лєм будзе спричинєна велька чкода, понеже Секретарият за културу и явне информованє финансує роботу дзевец меншинских медийох, пейц заводох за културу и ма 12 индиректних хасновательох, як цо то Сербски народни театер, Музей Войводини, Спомин збирка Павла Белянского, Покраїнски завод за защиту памятнїкох култури и други.
