На инициятиву и у орґанизациї Заводу за културу войводянских Руснацох, подпредсидатель Покраїнскей влади и покраїнски секретар за образованє, предписаня, управу и национални меншини-национални заєднїци Михал Нїлаш вовторок, 5. мая, привитал студентох сербского язика з Яґелоньского универзитету у Кракове, у Польскей.
Польских студентох, котри у нашей покраїни пребуваю у рамикох науковей екскурзиї з назву „Войводина – богатство розличносцох”, предводзел доктор линґвистики Томаш Квока, з Института за славянску филолоґию Яґелоньского универзитету у Кракове.
Попри покраїнского секретара, присутних за образованє привитали и Драґица Колджин, совитнїца за медзиреґионалне сотруднїцство у обласци науки и Адриан Борка, висши фахови сотруднїк за витворйованє людских и меншинских правох, котри польским студентом представел роботу Покраїнского секретарияту за национални меншини-национални заєднїци.
Зоз студентами на приєму присуствовал и директор Заводу за културу войводянских Руснацох Серґей Тамаш.
