Протокол о сотруднїцтве Завода за културу войводянских Руснацох и Новинарскей асоцияциї Руснацох (НАР) у Новим Садзе 10. септембра, у присустве Єлени Перкович, єдней зоз сновательох и членїци Вивершнопго одбору НАР-у, потписали директор Заводу мр Серґей Тамаш и предсидателька НАР-у Мартица Тамаш.
Зоз потписованьом протокола Завод и НАР ше обовязали же вєдно буду реализовац едукацию о писаню проєктох, и едукацию за унапредзенє професийних стандардох, хтори унапрямени на унапредзованє информованя, видавнїцтва и роботи медийох, културно-уметнїцких и просвитних дружтвох Руснацох у Републики Сербиї.
Новинарска асоцияция Руснацох (НАР) порушала инициятиву же би ресурсни центар гражданских инициятивох зоз Беоґраду помогнул у едукациї членох НАР-у як и других припаднїкох рускей заєднїци коло писаня и управяня зоз проєктами.
– Ресурсни центар з Беоґраду прилапел тоту инициятиву и тих дньох ше профилує змист роботньох. У тей инициятиви важну улогу ма и Завод котри обеспечи простор и други условия котри потребни за отримованє спомнутей едукациї – гварела Єлена Перкович.
Директор Заводу мр Серґей Тамаш наглашел же потписани Протокол о сотруднїцтве медзи Заводом и НАР-ом змоцнї нашо институциї, бо ше нашо руски фаховци и кадри буду едуковац у обласцох хтори актуални. Буду вєдно конкуровац и при домашнїх и при европских фондох, а познате же сучасна Европа и єй институциї свойо активносци у велькей мири базую на гражданских инициятивох и активней учасци нєвладового сектору.
– Праве през орґанизованє таких фахових семинарох Завод сце потримац цивилни сектор у рускей заєднїци и направиц условия за формованє проєктних тимох здруженьох у хторих ношителє активносцох буду нашо млади високообразовани кадри.
Тото цо актуални тренд и круциялне у рускей заєднїци же зме у остатнїх рокох вибудовали здраву професийну климу медзи рускима елитнима институциями, а наш главни циль – робота на общи хасен Руснацох и рускей националней заєднїци. Почитуєме нєдавну суґестию Мониторинґ мисиї Совиту Европи – повязац ше, умрежиц шицки институциї з нука националней меншини под єден амрел и робиц на хасен заєднїци.
Конєчно пришли фахово людзе хтори ше стараю за Руснацох и робя на хасен рускей заєднїци без острасценосци и пристрасносци, фаховосц спред особних интересох – заключел мр Сергей Тамаш.
Завод потримує НАР од його снованя, а тераз, уж треци рок за шором, НАР фахово едукациї отримує у просторийох Завода и тото помоц нам од велькей важносци – гварела предсидателька НАР-у Мартица Тамаш.
