Завод за културу войводянских Руснацох достал средства од Городскей управи за културу Городу Нового Саду за видаванє осучаснєного Правопису и Правописного словнїку авторох проф. др Михайла Фейси и Гелени Медєши.
Основи за виробок того правопису то Граматики бачваньско-рускей бешеди (Сримски Карловци 1923) др Ґабра Костельника и Правопис Миколи М. Кочиша. Нови, подполнєйши правопис облапи правописну норму хтора будзе осучаснєна, доробена и у потребней мири прилагодзена ґу новим вимаганьом розвою руского язика и ґу обставином у яких жиєме, тримаюци ше началох постояносци и континуитету нашей литературноязичней култури и норми.
У наиходзацим периодзе буду орґанизовани додатни округли столи и консултациї у вязи зоз нормами и терминами хтори буду облапени у новим Правопису. Шицки заинтересовани свойо предклади, коментари и питаня у вязи зоз правописом руского язика мож послац на имейл адресу: mihajlo.fejsa@ff.uns.ac.rs.
