Як резултат проєкту “Културне нашлїдство през мой обєктив” хтори финансийно потримала Фондация “Нови Сад 2021 – Европска престолнїца култури” отримани пейц вистави фотоґрафийох у Новим Садзе, Билей церкви, Петровцу на Млави и Суботици.
У рамикох того проєкту 17 штредньошколци, припаднїки рускей, влашскей, ромскей, ческей, бунєвацкей и сербскей заєднїци участвовали на вецей преподаваньох и роботньох на теми значносци очуваня културного скарбу, интеркултуралного диялоґу и фотоґрафиї. Як резултат того вони креировали свойо дожице тих темох и понукли их як артефакт публики у штирох городох зоз хторима нас шицких поволали же бизме роздумовали о предкох, нас самих и ґенерацийох хтори приходза за нами.
Тот проєкт єден зоз проєктох хтори Завод за културу войводянских Руснацох реализує у рамикох програми розвою публики зоз чим отвера свойо дзвери публики же би сама креировала змисти хтори Завод понука и на тот способ будує свою будуцу публику.
Дзекуєме Националному совиту Чехаох, Ґимназиї “Лаза Костич”, Националному совиту Влахох, КПЦ “Петровац на Млави” и Фондациї “Данило Киш”, як и шицким ментором, преподавачом и учашнїком на потримовцки у реализациї проєкту.
