Вистава „Обряди преходох у фокусу обєктива фотоґрафох Будински”, чийо поставянє финансийно потримала Городска управа за културу Городу Нового Саду у рамикох ширшого проєкту “Руснаци у циклусу животних обичайох”, отворена вовторок, 5. новембра у Архиве Войводини у Новим Садзе и годно ю опатриц по 12. новембер.
После отвераня отримана и трибина на тему значносци културного скарбу и важносци уключованя шицких людзох до процесох очуваня културного нашлїдства о чим бешедовали др Миряна Дєкич зоз Покраїнского заводу за защиту памятнїкох култури и Любица Отич зоз Музею Войводини, хтори и длугорочни сотруднїци и партнере Заводу на проєктох диґитализациї.
Виставу творя 23 панои на хторих приказани вибор фотоґрафских материялох хтори достати скенированьом склєняних плочох фотоґрафох Будински зоз Руского Керестура. Дзекуюци Ирини Химелсбах, єдней зоз потомкох спомнутих фотоґрафох хтора тоти плочи охабела Парохиї у Руским Керестуре, достата можливосц же би ше тото нєвичерпне жридло информацийох о рускей култури и историї диґитализовало, обробело и толмачело.
Тота вистава и трибина викрок рускей заєднїци ґу ширшей явносци и пробованє пременки перцепциї култури националних заєднїцох як виключно танєчних, фолклорних и ґарстономских манифестацийох. Зоз понуканьом иншаких змистох указуєме и гуториме – ту зме уж длугши час и часц зме културного идентитету Нового Саду и Войводини.
Виставу привитал директор Архву Войводини др Небойша Кузманович, а урядово ю отворела директорка Заводу Анамария Ранкович.
