Завод за културу войводянских Руснацох у рамикох проєкту: Учме вєдно руски язик: Читай ми!” потримал креированє шейсцох видео приповедкох и рисованих филмох за дзеци. Премиєри тих рисовних отримани у просторийох Заводу, а потим традицийно реализовани и интерактивни и креативни роботнї за дзеци и родичох. Проєкт реализовали Александра Бучко и Саня Дивлякович спред Новинарскей асоцияциї Руснацох, а финансийно го потримал Завод. Шицки приповедки ше находза на урядовим Ют’юб каналу Заводу и титловани су на сербски язик.
Першу видео приповедку хтору проєктни тим порихтал була “Тидвик, добродушни єлень” Др. Суса. У реализациї видео приповедки участвовали Желько Тот як знїматель, Йован Живкович як монтажер и аниматор. Приповедка поробена у сотруднїцтве зоз НИУ “Руске слово” хторе видало тоту приповедку ище 1953. року.
Друга приповедка то преприповедана “Ґаравка” Шарла Пероа. Преприповедала ю Саня Дивлякович, видео материял знїмал Желько Тот, монтажу и анимацию поробел Йован Живкович, а фахову помоц обезпечели София Николаєвич и Мелания Римар.
Треца приповедка то приповедка “Чом добре буц рибар” авторки Меланиї Римар. Знїматель бул Желько Тот, а монтажер и аниматор Йован Живкович. Приповедка поробена у сотруднїцтве зоз НИУ “Руске слово” хторе видало тоту приповедку у кнїжки “Гайзибан на шпарґу” 2016. року.
Штварту приповедку тиж преприповедала Саня Дивлякович. Слово о приповедки Браци Ґрим “Шнїгочка“. Видео материял знїмал Желько Тот, монтажу и анимацию поробел Йован Живкович, а фахову помоц обезпечели София Николаєвич и Мелания Римар.
Шесте премиєрне приказованє рисованого и роботня за дзеци була резервована за приповедку “Червена шапочка” Браци Ґрим. Приповедку преприповедала Саня Дивлякович, а анимацию и монтажу поробела Лидия Ивак, звук Милан Ґузиян, а фахову помоц обезпечели Татяна Беук Латяк и Мелания Римар.
Шпицу и музику за шицки видео приповедки и рисовани поробел Йован Живкович.
После премиєрного емитованя каждей видео приповедки орґанизована и тематска роботня з мотивами одпатреней приповедки и друженє за дзеци.
