Остатнї дзень Медзинародного сайма кнїжкох у Новим Садзе, штварток, 10. марца, у Мастер гали Новосадского сайму свойо виданя представел и Завод за културу войводянских Руснацох.
На главней бини представени два капитални виданя Заводу: моноґрафия “Руски Керестур ‘живот и обичаї Руснацох у обєктиве фотоґрафох Будински”, авторки др Миряни Дєкич и осучаснєни Правопис руского язика зоз правописним словнїком, авторох проф. Михайла Фейси и Гелени Медєши, хтори видати вєдно зоз Дружтвом за руски язик, литературу и културу и Филозофским факултетом.
Потим, пре огранїчени час за представянє, на штанду Покраїнского секретарияту за културу, информованє и одношеня зоз вирскима заєднїцами представени и инши публикациї Заводу, як цо то Зборнїк роботох зоз пиятей рускей науковей конференциї за студентох, младих науковцох и фаховцох, як и сликовнїца зоз налїпками Карусел. Тоти публикациї видати дзекуюци сотруднїцтве Заводу зоз длугорочнима партнерами: нєформалну ґрупу “Виглєдовацки круг”, Филозофским факултетом – Одсеком за русинистику, НВУ “Руске слово”.
Як наглашели директоре Заводу и Руского слова пошло ше и крочай далєй, та направени и мултимедиялни змист на основи илустрацийох за сликовнїцу “Карусел”, хтори доступни на сайтох и урядових Заводу и Руского слова каналох на ю’тюбу.
