У рамикох Централней преслави националного швета Руснацох у Шветочней сали Музичней школи „Петар Кранчевич” у Сримскей Митровици отримани Усни новини НВУ„Руске слово”. Подїя на хторей читательскей публики представени виданя и дїялносц „Руского слова“ отримана з нагоди 100-рочнїци „Руских новинох” хтора означена влонї и 80-рочнїци НВУ „Руске слово” хтора ше полнї того року.
На Усних новинох хтори були барз добре нащивени з домашню публику, алє и з численима нашима читателями з других местох дзе жию Руснаци, бешедовали представителє НВУ „Руске слово” хтори представели цали спектер виданьох и медийней дїялносци Установи.
Пред початком Шветочней академиї у Сримскей Митровици у голу Театра „Добрица Милутинович” отворена вистава под назву „Мальованє сримскей цихосци” подобовей уметнїци Ясни Арбанас з того городу.
Виставу отворел директор Заводу за културу войводянских Руснацох Саша Сабадош, а деталї з биоґрафиї Ясни Арбанас представел Звонко Беднар спред Дружтва Руснацох Сримскей Митровици. Як гварел, слово о длугорочней активней членїци Дружтва, уметнїци хтора по фаху правнїца а по вокациї поетеса, рецитаторка и малярка чия робота и творчосц замеркована и припозната и звонка родного городу и локалней уметнїкей сцени.
О подобовей творчосци Ясни Арбанас у хторей доминую пейзажи и мертва природа, насампредз мотиви венчикох з осушеного квеца, бешедовала историчарка уметносци Мария Вукайлович, хтора и авторка двоязичного пригодного провадзацого каталоґу вистави „Мальованє сримскей цихосци”.
