Вчера, у Заводу за културу войводянских Руснацох, отримана промоция кнїжки „Як гуторя дїдове – швет бул давно иншаки” автора о. Владимира Еделинского Миколки. Слово о студиї о основних характеристикох Руснацох у Бачки и Сриме, хтора заєднїцке виданє НВУ „Руске слово” и ЗКВР.
![](https://zavod.rs/wp-content/uploads/2023/10/08-2023-10-05-NS-promocija-o.V.Edelinski-Mikolka-W-71.jpg)
На промоциї бешедовали директор НВУ „Руске слово” др Борис Варґа и директор ЗКВР Саша Сабадош, а модератор бул одвичательни редактор Видавательней дїялносци НВУ „Руске слово” Микола Шанта. О кнїжки бешедовали и рецензенти етнолоґ др Татяна Буґарски зоз Музею Войводини, етнолоґ Любомир Медєши и социолоґ Ваня Дула.
![](https://zavod.rs/wp-content/uploads/2023/10/08-2023-10-05-NS-promocija-o.V.Edelinski-Mikolka-W-55.jpg)
Як поведзене, студия „Як гуторя дїдове – швет бул давно иншаки” о основних традицийних характеристикох Руснацох у Бачкей и Сриме, дзе представени звичаї, фолклор, етноґрафски прикмети, вереня и вообще каждодньови живот наших старих, представя значни крочай у компаративним виглєдованю обичайох Руснацох з обидвох бокох Дунаю. Окрем аналитичней, емпирийна компонента тей студиї окреме доприноши єй значносци за розвой русинистичних студийох.