Централна преслава Националного швета Руснацох у Сербиї 2020. року була у знаку локалней рускей заєднїци, та ше през шицки часци прорами прецаговала тота нїтка.
Преслава почала з Архиєрейску благодарну Службу Божу у Церкви Преображеня Господнього у Шидзе, хтору предводзел наш епарх кир Георгий Джуджар, а сослужели о. Владислав Варґа, о. Михайло Режак, о. Юлиян Рац, о. Дарко Рац, о. Владимир Еделински Миколка и о. Алексей Гудак.
На 18 годзин у КПД „Дюра Киш“ нащивителє мали нагоду коштовац традицийни руски єдла и специялитети хтори порихтали жени зоз Здруженя женох „Маря“.
У голу Општини Шид отворена вистава под назву „Шидянски фарби и форми“, хтора облапя 20 малюнки и 15 фотоґрафиї. Слово о малюнкох зоз потерашнїх подобових колонийох „Руски двор“ и фотоґрафийох Ивони Торма Джамич, хтори приказую руски дзивки и леґиньох у народним облєчиве. Вибор направела Олґа Карлаварис. Вистава будзе отворена у голу општини по 24. януар од 9 -15 годзин.
На 20 годзин у сали Културно-образовного центру почала Шветочна академия у хторей визначени значни ювилей – 100-рочнїца орґанизованого културно просвитного живота Руснацох у Шидзе. През програму ше прецаговали дїла Михайла Ковача, хтори народзени праве у Шидзе, а у академиї участвовали и домашнї аматере.
Програму провадзели числени урядово особи зоз републичного, покраїнского и локалного уровню.
