Централна преслава Националного швета Руснацох того року будзе отримана 21. януара у Дюрдьове.
Преслава почнє зоз Вечурню хтору у дюрдьовскей церкви Рождества Пресвятей Богородици на 17 годзин будзе служиц владика Георгий Джуджар, а потим, на 18:30 годзин у парохийней сали у церковней порти будзе етно стол.
Вистава „Так дакеди жили Руснаци у Дюрдьове” будзе отворена на 19 годзин у будинку Рускей школи, а Шветочна академия почнє на 20 годзин у Велькей сали Задружного дома.
На Академиї буду участвовац Церковни хор „Розанов” под руководством Татиани Барна и Дзивоцка шпивацка ґрупа Културно-уметнїцкого дружтва „Тарас Шевченко” зоз Дюрдьова хтору пририхтала Сенка Станкович. У програми наступя и шпиваче Марко Радишич, Вера Салонски и Мирела Тимко. Свойо точки у програми будзе мац и Национални оркестер под руководством Мирослава Папа, а тиж будзе и провадзиц учашнїкох Академиї.
Коктел и друженє после Шветочней академиї будзе у просторийох Културно-уметнїцкого дружтва „Тарас Шевченко” у Дюрдьове.
