Централна шветочносц Националного швета Руснацох у Републики Сербиї хторе ше означує 17. януара, того року будзе отримана у Сримскей Митровици на соботу, 18. януара.
Централна програма будзе отримана на соботу, 18. януара у Сримскей Митровици, а шветочносц почнє зоз Архиєрейску Службу Божу на 16 годзин у Церкви Вознесения Господнього хтору предводзиц будзе преосвящени владика кир Георгий Джуджар.
Потим у Парохиялней сали од 17:15 годзин будзе поставени етно стол хтори пририхтую членїци Здруженя женох „Бикичанки”.
На 18 годзин з нагоди 100 рокох од першого виданя „Руских новинох” и 80 рокох Новинско-видавательней установи „Руске слово” буду отримани Усни новини у Шветочней сали Музичней школи „Петар Краньчевич” на хторих буду бешедовац представителє нашей Установи.
На 19:15 годзин у Голу Театра „Добрица Милутинович” будзе отворена вистава подобовей уметнїци Ясни Арбанас под назву „Мальованє сримскей цихосци”.
Шветочна академия почнє на 20 годзин у Велькей сали Театра „Добрица Милутинович” у Сримскей Митровици. У програми на Шветочней академиї участвовац буду Мишана шпивацка ґрупа Руского културного центру з Нового Саду, Национални оркестер под руководством Мирослава Папа и волкални солиста Йовґен Надь, док векшину репертоару – народни и популарни шпиванки, класични композициї, рецитациї и бешеди виведу представителє рускей заєднїци зоз Сримскей Митровици – Мишана шпивацка ґрупа „Руски соловеї“ Дружтва Руснацох у Сримскей Митровици, Ивана Ференц (ґитара), дует Александар Цундра (клавир) и Исидора Козлина (флаута), рецитаторка Ясна Арбанас и ґлумец Владимир Балащак.
