Всоботу, 21. януара 2023. року, отримана Централна преслава Националного швета Руснацох.
Перша часц преслави-Благодарна Архиєрейска Служба Божа, отримана у грекокатолїцкей церкви Успения Пресвятей Богородици у Коцуре. З тей нагоди владика кир Георгий Джуджар придал домашньому парохови о. Рацови Декрет прелашеня коцурскей парохиялней церви Успения Пресвятей Богородици за прокатедралну церкву Епархиї св. Миколая.
По законченю Служби Божей, у просторийох Парохиялного Каритасу „Марийов дом” у Коцуре отворена и вистава „Шлїди за паметанє”, коцурских уметнїкох – малюнкох Миколи Буши, Силвестера Пушкаша и скулптурох Силвестера Макая. Авторка вистави, як и провадзацого каталоґу, Олґа Карлаварис. Виставу отворел министер за людски и меншински права и дружтвени диялоґ Томислав Жиґманов, котри з тей нагоди и повинчовал Националне швето шицким Руснацом. У мено орґанизатора, шицких присутних привитал и виставу представел директор Завода за културу войводянских Руснацох Саша Сабадош, хтори визначел же ше з тоту виставу на одредзени способ жада означиц и 100 рочнїцу народзеня и 50 роки шмерци першого академского скулптора у нашим народзе Евґена Кочиша, як и авторох котри на одредзени способ його шлїдбенїки. З пригоднима словами присутних привитала и Ирина Гарди Ковачевич, хтора з тей нагоди пречитала и стихи писателя Янка Фейси.
По законченю вистави „Шлїди за паметанє” за нащивительох бул поставени богати етно стол у Церковней сали. Числени жени зоз Активу женох КУД „Жатва”, на чолє зоз предсидательку Коцану Колєсар, за тото значне швето приготовели рижни смачни домашнї лакотки.
