Централна преслава Националного швета Руснацох отримана, 23. януара, у Сербским народним театре у Европскей престолнїци култури у Новим Садзе. Програма облапела Архињрейну службу Божу, виставу “Паметанє и тирванє” и шветочну академию.
Централна преслава почала зоз Архиєрейску благодарну Службу Божу хтору предводзел наш епарх кир Георгий Джуджар, у Церкви св. апостолох Петра и Павла у Новим Садзе. Сослужели о. Владислав Варґа, о. Дарко Рац, о. Владимир Еделински Миколка и домашнї парох о. Юлиян Рац, а дзияковал Йовґен Надь.
У рамикох Централней шветочносци у фоаєу Сербского народного театру отворена вистава „Паметанє и тирванє”, уметнїцох Гелени Сивч и Лидиї Рамач.
Руска заєднїца ше цеши зоз вельким числом образованих Руснацох, а даєдни професийни уметнїки хтори розошати у швеце нє могли буц присутни на сцени, алє шветочносц збогацели зоз видео-знїмками у хторих винчовали Швето и виведли найлєпши нумери зоз свойого репертоару. Оперска и камерна шпивачка Люпка Рац, родом зоз Руского Керестура, явела ше зоз Швайцарскей и виведлa Gaetano Doniyetti „Lucia di Lammermoor”. Успишни орґуляш Саша Ґрунчич родом зоз Суботици, тераз жиє у Заґребе и одграл на орґульох композицию „Озеро очи твойо” Владислава Надьмитя. Пияниста, доктор Дарко Варґа родом зоз Нового Орахова и Бачкей Тополї, видео послал зоз Зєдинєних Америцких Державох. Представел ше зоз M. Ravel „Gaspard de la Nuit Ondine”.
Композицию „Леґенда” за гушлю и клавир компоновал наш композитор Иван Ковач и пошвецел ю своєй дзивки Катарини Ковач. Вона ю з тей нагоди на гушлї виведла вєдно зоз колеґиню Наташу Пандурович, хтора ю провадзела на клавиру на живо у сали. Стихи писнї „Писмо на селище” Михала Рамача гуторел наш познати рецитатор Мирослав Малацко. Национални оркестер, у чиїм составе професоре музики, академски образовани инструменталисти, студенти музичних академийох под дириґентску палїчку Мирона Сивча, виведол Обробки руских мелодийох, потим Венчик руских мелодийох. Шветочносц отворел и завар Хор “Гармония” зоз гимнами и шветочну писню.
Шветочней академиї з тей нагоди присуствовали министерка за людски права, права меншинох и дружтвени диялоґ Ґордана Чомич, покраїнски секретар за културу, явне информованє и одношеня з вирскима заєднїцами Драґана Милошевич, предсидателька Скупштини Городу Нови Сад Єлена Радомирович Маринкович, Владика кир Георгий Джуджар, представнїки министерства за култури и информованя, министерства просвити и технолоґийного розвою, министерства державней управи и локалней самоуправи, Покраїнского секретарияту за образованє, предписаня и национални меншини, делеґация Руснацох зоз Горватскей, члени Националного совиту, установох и образованих инститицийох, културно-уметнїцких дружтвох и вельочислена публика.
Шветочносц порихтали Орґанизацийни одбор Централней шветочносци, Завод за културу войводянских Руснацох и Национални совит Рускей националней меншини зоз потримовку Сербского народного театру и Радио-телевизиї Войводини, а дзекуюци финансийней потримовки Покраїнского секретарияту за културу, явне информованє и одношеня зоз вирскима заєднїцами.
