Покраїнски секретарият за културу и явне информованє и Славиша Ґруїч, його ресорни секретар були домашнї на роботней схадски зоз директорами Заводох за културу Войводини. Учасц вжали: Владимир Копицл (Завод за културу Войводини), Серґей Тамаш (Руснаци), Томислав Жиґманов (Хорвати), Милина Склабински (Словаци), Гонди Мартина (Мадяре) и Тодор Урсу (Румунє).
Централна тема о хторей було бешеди то у наяви Округли стол – промоция и презентация шицких шейсц Заводох на наступаюцим « OPEN DAYS « 2015. у Бриселу хтори будзе отримани 13. октобра у просторийох Европского парламенту. Заплановане же домашнї на Округлим столу будзе Едвард Кукан, посланєц у Европским парламенту хтори будзе и предшедаюци у координациї зоз Working Group Western Balkans, дзе иншак пан Кукан предсидатель и зоз технїчну потримовку канзелариї войводянского «Фонда европски роботи» у Бриселу як и Амбасади Републики Сербиї.
Як наглашел секретар Ґруїч, указана нагода и можлївосц презентациї Заводох на такей манифестациї вшелїяк же велька чесц и за сами Заводи а окреме за нашо национални заєднїци як и за шицки найзначнєйши покраїнски войводянски институциї. Значне визначиц же предвидзени час за Округли стол 90 минути, цо кед опатриме на праксу за таки файти промоцийох на самим ОPEN DAYS наисце нє мало часу и велька професийна обовязка за Заводи / шицки присутни ше єдногласно усоглашени же буду участвовац бо указана нагода за учасц на єдней такей манифестациї наисце єдинствена приказац свойо богатство розличносци и тото почим ше кажда заєднїца цеши и розликує а часц є интеркултуралней и мултиетнїчней Войводини.
Презентация будзе составена зоз двох часцох: кратки документарни филм од 7 минути за кажду меншину окреме / акцент на историйно-културолоґийним приказу Руснацох и рускей националней заєднїци на тих просторох, док друга часц базована на презентациї активносцох самих заводох – заплановани час тиж 7 минути / дзе ше през power point презентацию прикажу найзначнєйши активносци заводох и напрямки сучасних културних политикох при Руснацох, актуелни проєкти як и перспективи будуцих напрямох розвитку заводох.. Цильна ґрупа потенцийних слухачох на тим округлим столу – представителє канзеларийох европских реґийох у Бриселу, медиї, европосланїки хтори фаховци за национални меншини и Заходни Балкан як и еминентни представителє европских институцийох култури итд. Окрем того, за вечар ше планує орґанизовац у Амбасади РС мултимедиялну виставу дзе буду заступени шицки заводи (технїчна порада коло можлївих темох як и самих детальох у предстояцим чаше лєм шлїдзи).
