Директор ЗЗКВР мр Серґей Тамаш нєшка мал роботну схадзку зоз др Миряну Менкович, директором Етноґрафского музею и єй сотруднїцу Александру Левнаич, началнїком Одзелєня – вишим кустосом. У роботней часци учасц вжали и др Миряна Джекич зоз Покраїнского заводу за защиту памятнїкох култури и Деян Радованович, совитнїк у истим Заводу. Главна тема о хторей було бешеди – тото цо єден од главних стратеґийних роботних приоритетох кед у питаню тогорочни активносци Заводу – промоция и презентация Руснацох и рускей националней заєднїци у Етноґрафским музею у самим центру нашей престольнїци хтора порадзена за 14. авґуст – святочни церемониял отвераня (место отримованя централна ткв. Фордова сала) по 31. авґуст, кеди ше ма заврец руска поставка.
Концепцийно порадзене и заплановане же би ше през штири розлични програмски змисти представело шицко тото цо найлєпше и найрепрезентативнєйше при войводянских Руснацох. За таку файту промоциї, хтору потераз мала лєм словацка национална меншина, потребна заєднїцка координация и уключованє шицких наших институцийох (того року Руснаци, а идуцого 2017. року Мадяре). Порадзене же шицки деталї коло самей промоциї як и будуци напрями и можлївосци заєднїцкоґо фахового сотруднїцства помедзи Заводом и Музейом, хтори важне наглашиц Установа култури од Националного значеня, буду облапени у Спорозуменю хторе будзе подписане у наиходзацим чаше.
