У своєй официйней роботней нащиви Новоґо Саду, йоґо Ексецеленция, Полноправни и ополномоцени амбасадор України у Републики Сербиї, Олександр Олександрович вєдно зоз свою сотруднїцу Наталию Маркевич, Першим секретаром за политични и билатерални одношеня нєшка нащивели Войводянску академию наукох и уметносцох (ВАНУ). У мено домашнїх, у делеґациї були академики Юлиян Тамаш предсидатель ВАНУ, члени предсидательства Рудолф Кастори и Бранислав Ґудурич и Милош Тешич, Ґенерални секретар. На схадски бул присутни и у роботней часци учасц вжал и Серґей Тамаш, Директор Заводу за културу войводянских Руснацох.
Теми о хторих ше бешедовало були актуалносци и можлївосци интензивованя сотруднїцства после подписованя медзирегионалних догваркох зоз Закарпатску и Києвску обласцами \ окреме у секторох науки (медзи академиями), образованя ( школи факултети универзитети зоз окремним акцентом на черанку школярох и студентох), култури и видавательней дїяльносци, заєднїцких виглєдовацких проєктох и заєднїцким конкурованю спрам ЕУ фондох и медзирегионалним сотруднїцстве.
Окрем Академиї, делеґация Амбасади України нащивела и мала стретнуца зоз представнїками Покраїнскей влади, Привредней комори Войводини и у РТВ-у.
