Стреду, 22. децембра, у Културней станїци Свилара у Новим Садзе отримана перша святочна промоция троязичней моноґрафиї „Руски Керестур – Живот и обичаї Руснацох у обєктиве фотоґрафох Будински” авторки др Миряни Дєкич, хтору обявел Завод за културу войводянских Руснацох.
Моноґрафия представя свойофайтову коруну вецейрочного партнерского подняца Заводу и Покраїнского заводу за защиту памятнїкох, хтори почал зоз диґитализованьом склєняних фото-плочох зоз студия дакедишнєй сликерскей фамелиї Бруґош зоз Керестура. У Моноґрафиї публиковани и описани даскельо стотки фотоґрафиї ґруповани по тематики з провадзацим реґистром и менаром, а у уводней часци дати историйни прегляд Руснацох на тих просторох и їх першого и найвекшого валалу.
О моноґрафиї бешедовали проф. др Янко Рамач, рецензент, проф. др Дюра Гарди, историчар и сама авторка. Як часц промоциї Моноґрафиї у Свилари поставена и провадзаца тематична вистава паноох з репродукованима фотоґрафиями „Обряди преходох у фокусу обєктиву фотоґрафох Будински”, хтора уж була викладана у Беоґрадзе, Свиднїку и Архиву Войводини у Новим Садзе. Виставу у Свилари годно опатриц од 10 до 18 годзин по 26. децембер.
