У просторийох Руского КУД „Др Гавриїл Костельник” вчера отримана схадзка Орґанизацийного одбору за Централну шветочносц означованя националного швета Руснацох, хтора 16. януара отримана у Кули, на хторей анализовани пририхтованя и саме витворенє програми Централней шветочносци.
На тей закончуюцей схадзки Орґанизацийного одбору за шветочносц у Кули визначене же ше члени домашнього Руского КУД, як главного соорґанизатора програми, добре знашли и орґанизовали у пририхтованю и витвореню аж осем сеґментох програми, же ше и саме КУД представело у найлєпшим шветлє, а маюци у оглядзе познєйши упечатки и думаня присутних и госцох – оценєне же орґанизацийно и по квалитету програмох, Централна шветочносц у Кули була барз успишна и на високим уровню.
Єдина заувага и членох Орґанизацийного одбору и патрачох знїмку шветочней академиї на РТВ Войводини була на слабше озвученє дзепоєдних точкох на Академиї цо, як поведзене, будзе вжате до огляду при пририхтованю Централней шветочносци нарок, у Бикичу.
Як барз добре оценєте же у програмох були визначени нашо уметнїки-професионалци з Кули и други, а велька вредносц Централней шветочносци же за ню остала и перша окреме написана кнїжка о Руснацох у Кули.
На схадзки Орґанизацийного одбору подзековане шицким котри на даяки способ участвовали у орґанизованю и на самих програмох Централней шветочносци, визначене же програми були добре нащивени, провадзели их нашо людзе зоз скоро шицких наших местох, алє и Руснаци з Горватскей, а и на тот завод ище раз на помоци у орґанизованю Шветочносци подзековане Школи за основне музичне образованє Кула, Културному центру Кула, як и локалней саамоуправи.
