Вчера, 5. мая, на остатнєй схадзки Управного одбору Заводу за културу войводянских Руснацох (ЗКВР) у тим зволаню прилапени Финансийни звит и Звит о роботи Заводу за 2015. рок.
Як гварел директор Заводу Серґей Тамаш, прешлого року приходи були коло 7,9 милиони динари, дзе з буджету Войводини достати 6,7 милиони, а з других жридлох 1,2 милиони динари. У Заводзе нєдавно була инспекция и преконтроловала шицки одлуки и рахунки и дала позитивне думанє.
У ширшим Звиту о роботи визначене же Завод и прешлого року бул орґанизатор Централней преслави националного швета Руснацох, видал даскельо капитални кнїжки, орґанизовал вецей вистави, а витворел и мултиязичну представу – „Свадзба” А. П. Чехова.
Серґей Тамаш наявел и одредзени пременки у програмней часци роботи Заводу, насампредз у концепциї Централней програми означованя националного швета. У тим напряме плановане орґанизовац окремну схадзку на хторей будзе слова о єдинственшей и туньшей програми означованя нашого швета.
Понеже на Покраїнскей влади уж меновани нови члени Управного одбору ЗКВР, пошвидко будзе отримана и його конститутивна схадзка.
