У нових просторийох Завода за културу войводянских Руснацох (Матици сербскей 15), отримана Схадзка Управного одбору.
Схадзку водзел предсидатель УО Серґей Тамаш, а на дньовим шоре було пейц точки о хторих ше одлучовало. Найзначнєйши ше одношели на розподзельованє средствох по обласцох зоз Конкурсу, як и приношенє одлуки о розписованю Конкурсу за софинансованє програмох и проєктох у обласци очуваня, пестованя, презентациї и розвою култури и уметносци нашей заєднїци у Републики Сербиї у 2023. року.
Як и по тераз, сума од милион динари розподзелєна за програми хтори ше одноша на очуванє и пестованє нєматериялного скарбу култури Руснацох – 700.000 динари, а за програми хтори ше одноша на сучасну уметнїцку творчосц 300.000 динари.
Конкурс будзе отворени од 18. априла по 21. май 2023. року, а нєобходни обвисценя и формулари за приявйованє годни сце превжац на тим линку.
Резултати вреднованя Проєктох фаховей Комисиї буду познати найпознєйше 30 днї од дня законченя приявйованя.
Одлуки о тих найзначнєйших точкох єдногласно прилапени.
Под точку Рижне на схадзки винєшени думаня и идеї о вецей манифестацийох и активносцох хтори ше одноша на потенциялни проєкти.
