На Шветочней академиї з нагоди националного швета Руснацох у Кули всовоту, 16. януара окреме привитани ґенерални секретар предсидателя Републики Сербиї Неделько Теньович, заменїк предсидателя Општини Кула Велибор Милоїчич, подпредсидатель Покраїнскей влади Мирослав Васин, помоцнїк покраїнского секретара за образованє, предписаня, управу и национални заєднїци-меншини Янош Орос, предсидатель Националного совиту (НС) Руснацох и покраїнски посланїк Славко Рац, народни посланїци у Народней скупштини Олена Папуґа и др Лїляна Бероня, монсиньор Янош Блаховяк – одправнїк роботох Апостолскей нунциятури у Сербиї и апостолски еґзарх за грекокатолїкох у Сербиї владика Георгий Джуджар.
Тиж привитани и члени Националного совиту Руснацох, представителє националних совитох други националних заєднїцох у Сербиї, нашо священїки, директор за културу Войводянских Руснацох мр Серґей Тамнаш, директорка НВУ „Руске слово” Мартица Тамаш, одвичательни редактор новинох „Руске слово” др Борис Варґа, одвичательни редакторе рубрикох на руским язику РТВ Златица Няради и Мирко Канюх. На Акедемиї присуствовали и предсидателька СО Кула Снежана Мркаич, директорки наших школох – керстурскей „Петро Кузмяк” Хелана Пашо Павлович и коцурксей „Братство єдинство” Славица Байор, представителє КУД „Осиф Костельник” з Вуковару як госци кулского РКУД, а телеграми винчованки за швето послали предсидатель Скупштини АП Войводини Иштван Пастор и амбасадор України у Сербиї Олександер Александрович.
Предсидатель Националного совиту Руснацох Славко Рац здогаднул же Руснаци свойо националне швето славя дзевяти раз, кед крашнє видзиц нашо символи медзи державну и войводянску заставу, попри державней гимни послухац и нашу шветочну шпиванку, цо каждираз зворуши чувства. През вецей аналоґиї и историйни приклади Славко Рац акцентовал значенє традициї и култури у каждим дружтве, як и чувствительне медзисобне одношенє и взаємни обовязки векшини и меншинох.
Владика Георгий Джуджар поручел же нашо националне швето славиме зоз возвишеним чувством радосци и подзековносци, алє и зоз свидомосцу и одвичательносцу исц по драги на хтору нас виведли нашо прешли ґенерациї, а то чуванє и розвиванє вредносцох националного, културного и духовного живота. То тайна нашого успиху и дотерашнього постояня и ґаранция за будучносц.
– З тоту думку, ту у Кули указуєме чесц нашей рускей заєднїци, потримуєме ю и указуєме же су нє сами. Най тото швето будзе надихнуце у чуваню наших вредносцох з нову енергию и силу, з виру до Бога и надїю за його помоц и благослов – поручел кир Георгий на Шветочней академиї.
Ґенерални секретар предсидателя Републики Сербиї Неделько Теньович визначел доприношенє Руснацох у процесу присоєдинєня Войводини ґу Сербиї, котрим, после два и пол вики живота на тих просторох, нєшка ту оцовщина. Як гварел, окрем же Руснаци маю богату власну културу, обачлїво доприноша вшадзи дзе жию, а тиж су значна вяза Сербиї з державами штреднєй Европи одкаль походза.
Подпредсидатель Покраїнскей влади Мирослав Васин гварел же Руснаци часц колориту Войводини з яким ше Сербия може пишиц, бо нїдзе индзей нєт реґиї дзе вєдно жию 26 национални заєднїци, розлични и єдинствени, а кажда з нїх доприноши же би наша Покраїна у своєй сущносци и вредносцох уж була Европа у малим.
У мено локалней самоуправи, заменїк предсидателя Општини Кула Велибор Милоїчич по руски повинчовал националне швето и привитал шицких госцох. Окрем же визначел окремну важносц Руснацох за општину на чиєй териториї ше находзи, Руски Керестур, як гварел, шветови центер Руснацох. Прето локална самоуправа и надалєй, як и дотераз, у сотруднїцтве з рускима институциями, будзе потримовац руску културу и образованє, Милоїчич тиж наявел же циль општинских власцох злєпшац економски условия и ришиц комунални проблеми, хтори заєднїцки шицким жительом.
