У Заводу за културу войводянских Руснацох вчера, 24. априла отримани вечар пошвецени Гавриїлови Костельникови з нагоди значних ювилейох його литературней творчосци. Того року ше полня 100 роки од обявйованя його „Єфтайовей дзивки”, першого ориґиналного драмского твора по руски, як и 120 роки од обявйованя першей кнїжки уметнїцкей поезиї на руским народним язику – Идилского венца „З мойого валала”.
О значносци тих двох дїлох за нашу литературу и културу бешедовали академик Юлиян Тамаш, проф. др Дюра Гарди и доц. др Ана Римар Симунович. Медзитим, вони бешедовали и ширше о живоце и творчосци др Гавриїла Костельника о хторим повторене же бул велїкан свойого часу, нє лєм як основоположнїк нашого литературного язика и уметнїцкей литератури, алє и як национални будитель, теолоґ и духовнїк, автентични филозоф, вообще интелектуалєц европского ранґу.
