З нагоди означованя децению роботи и иснованя штирох Заводох за културу националних Словацох, Горватох Руснацох и Румунох як и Завод за културу войводянских Мадярох, хтори иснує 12 роки отворена мултимедиялна и мултикултурална вистава „Зоз слику вєдно“ у Новим Садзе, у просторийох добре познатого „Едьшеґ замку“
Кустис вистави Нела Тонкович за тоту виставу гвари же ше Заводи представели зоз сучасну уметносцу, цо викрок зоз дотерашнєй пракси.
На вистави участвую шесцеро уметнїки розличного возросту и кариєри (од тих цо лєм починаю свою уметнїцку драгу, по тих, уж афирмованих) хтори ше представели зоз розличнима роботами хтори настали през комбиновану технїку, фотоґрафию, литоґрафию, бабкох хтори ше хасную у стоп-моушн анимованю, скулптури – цо по словох кустоса Тонковичовей указує на шлєбоду виражованя и окремносци идеї.
Дарян Гарди зоз Руского Керестура представя Завод за културу войводянских Руснацох, а основни студиї закончел 2017. року на Академиї ликовних уметносцох и дизайну у Братислави (Словацкей), дзе студирал улустрацию у ателєу професора Душана Калая.
(Фотоґрафия: Фейсбук профил Даряна Гардия)
Од 2018. року студира на мастер студийох на Академиї ликовних уметносцох, архитектури и дизайну у Праги (Чешка), дзе виучує илустрацию у ателєу професора Юрая Хорвата.
На вистави „Зоз слику вєдно“ представя ше зоз роботами под назву „Форма“, а можеце опатриц и роботи: Давия Наґy Абонyия, Алени Клатиковей, Леи Видакович и Валентине Бростеан. Зоз нїма, на вистави участвує и ликовна уметнїца Мая Ракочевич Цвиянов.
З тей нагоди поволуєме вас же бисце нащивели виставу„Зоз слику вєдно“ по конєц октобра, после чого ше селї до Зренїнину (21. новембра 2018. року) и до Сенти (5. децембра 2018. року).
Авторка фотоґрафойох: Вероника Вуячич
