У Малей сали Музею Сриму у Сримскей Митровици заменїк городоначалнїка Томислав Янкович вчера вечар отворел виставу „Ружа на хусточки”, як закончуюцу часц проєкту з обласци применєней етнолоґиї Музею Сриму и Дружтва Руснацох у Сримскей Митровици.
На початку пригодней културно-уметнїцкей програми з нагоди отвераня вистави ґлумец Владимир Балащак присутних привитал и по руски, а попри часци Руснацох з Митровици и шидскей општини, на отвераню присуствовали и заменїк предсидателя Националного совиту (НС) Руснацох Йовґен Мудри, предсидатель Вивершного одбору НС Желько Ковач, директор Заводу за културу Войводянских Руснацох Серґей Тамаш и музейна совитнїца Любица Отич, котри з тей нагоди присутним представели и прешлого року обявене капиталне дїло Заводу „Народне облєчиво бачванско-сримских Руснацох”. У публики бул и сримскомитровицки парох о. Владислав Варґа.
Проєкт „Ружа на хусточки” тирвал коло рок, витворени є з финансийну потримовку Министерства култури Републики Сербиї, а руководзела з нїм Оливера Делич з Музею Сриму. Деличова, вєдно з Владимиром Перичом, и авторка вистави, а попри фотоґрафийох и других експонатох, виложени и на окремних роботньох виробени руски фитюли, та часци нашого народного облєчива хтори за тоту нагоду обезпечени и з дзепоєдних приватних збиркох.
