З потримовку Городу Нового Саду нєшка у просторийох Заводу за културу войводянских Руснацох отворена вистава фотоґрафийох „Виртуални мости Михайла Лїкара“.
З тей нагоди, Младен Булут зоз Дружтва новинарох Войводини наглашел же тото сотруднїцтво Заводу и Дружтва новинарох важне, алє и же є витворене прейґ автора фотоґрафийох, Михайла Лїкара, хтори окрем же є припаднїк рускей заєднїци єден є од важнейших и припознатших новосадских фотоґрафох.
Вистава представя фотоґрафиї хтори настали у периодзе од 60 роки, а Михайло Лїкар єден од фотоґрафох хтори участвовал и у обдумованю и орґанизованю велїх шветових виставох у Новим Садзе, як наприклад „Златне око“.
Директорка Заводу за културу войводянских Руснацох, Анамария Ранкович визначела значносц же би ше чувал материял фотоґрафского скарбу цо Завод и роби зоз проєктом чуваня склєняних плочох фотоґрафох Будински, та и зоз тоту виставу.
„Сцела бим наглашиц же зазберованє, обробок и презентованє ширшей явносци шицких материялох фотоґрафского скарбу нашей рускей заєднїци барз занєдзбани, и требали бизме ше дакус вецей занїмац и зоз тоту обласцу, а фотоґрафия нам барз важна як документарни материял хтори шведочи о нашей култури и историї. Тераз маме проєкт чуваня склєняних плочох фотоґрафох Будинскових, хтори би требал буц закончени на рок, алє потребне нє забуц и презентовац и сучасну фотоґрафию”.
Автор фотоґрафийох, Михайло Лїкар гвари же фотоґрафия важна прето же є документарни материял хтори шведочи о часу кеди тота фотоґрафия настала, алє и же вон, и после телїх рокох роботи ище вше ноши фотоапарат у кишенки.
Виставу фотоґрафийох сце годни опатриц у просторийох Заводу кажди роботнї дзень у периодзе од 10 по 15 годзин по други септембер.
