У Заводзе за културу войводянских Руснацох вчера, 15. юния, отримани Округли стол з тему „Костельник и ми нєшка”, а з нагоди означованя 130-рочнїци народзеня основоположителя литератури и култури войводянских Руснацох – др Ґавриїла Костельника.
Идея була же би ше после 68 рокох од Костельниковей шмерци бешедовало о уплїву його дїла и творчосци на сучасну руску литературу, културу, язик и историоґрафию, на виучованє його дїла у школох и на други аспекти живота рускей заєднїци у Сербиї. Єдна од идейох на нєшкайшим сходзе була же би требало видац Костельникову прозу и поезию у єдним тому – виданю (без Ґраматики и статьох о язику зоз потолкованима словами). Задумка же би ше тото виданє дзелєло по шицких наших местох, окреме школяром бо ище вше Костельник нє достаточно вошол до народу – нашо людзе го мало читаю – заєднїцке заключенє присутних.
З тей нагоди о Костельникови як писательови бешедовал академик Юлиян Тамаш, а о його историйней роботи проф. др Янко Рамач.
Микола М. Цап, редактор „Шветлосци” и Микола Шанта, редактор Видавательней дїялносци у НВУ „Руске слово” бешедовали о проєкту видаваня вкупного дїла Гавриїла Костельника хтори ше будзе заєднїцки реализовац зоз Заводом до конца того 2016. року кеди ше планує заєднїцка промоция. Проєкт почал 2008. року, а дотераз вишли три томи позбераних творох Костельника, док штварти том, з назву „Роса и слунко”, у друку.
