Медзинародни наукови симпозиюм „Владика Дионизий Няради: живот и дїлоˮ отримани 30. новембра у Руским Керестуре и 1. децембра у Новим Садзе, а отримани є з нагоди 150-рочнїци од народзеня владики др Дионизия Нярадия (1874–1940).
Симпозиюм пошвецени животу и дїлу владики др Дионизия Нярадия започал у Виронаучней сали на 15 годзин у присустве госцох, викладачох и заинтересованих вирних. У першей часци наступела и Женска шпивацка ґрупа Дома култури зоз двома духовнима шпиванками. Того пополадня наступели науковци, професоре, историчаре, виглєдоваче зоз Горватскей, Словацкей, Италиї (Риму), України, Македониї, Сербиї… Под час симпозиюма у сали у Каритасу отримана вистава пошвецена владикови Дионизийови.
Симпозиюм на хторим презентовани три реферати онлайн предлужени у Заводу за културу войводянских Руснацох у Новим Садзе. Дводньове збуванє закончене у приємней розгварки науковцох и здогадованю на владику др Дионизия Нярадия, хтори бул народзени у Руским Керестуре.
