Пияток, 6. октобра, у Заводу за културу войводянских Руснацох, отримане перше з наявених стретнуцох з визначнима поєдинцами з рускей заєднїци. Перши госц з тей нагоди бул Любомир Медєши (1949), етнолоґ, публициста и длугорочни културни и дружтвено-политични дїяч, хтори остатнї 30 роки жиє у Канади. Модератор бул директор ЗКВР Саша Сабадош.
![](https://zavod.rs/wp-content/uploads/2023/10/08-2023-10-06-NS-ZKVR-Medjesi-Ljubomir-W-9.jpg)
Медєши бешедовал о одрастаню у Руским Керестуре и початкох свойого явного анґажованя у заєднїци. Здогаднул на нєдостаточно припознату улогу учителя Янка Олеяра на швидки културни и дружтвени розвой найвекшого руского валала у другей половки ХХ вику, як и початки наукового интересованя югославянских фаховцох за етнолоґию и традицию Руснацох. Медєши тиж бешедовал о периодзе док як директор водзел НВП „Руске слово”, а окремна часц розгварки була пошвецена можлївосцом и перспективи орґанизованя рускей заєднїци у Канади, як и потенциялней будучносци нашей наймладшей дияспори.
![](https://zavod.rs/wp-content/uploads/2023/10/08-2023-10-06-NS-ZKVR-Medjesi-Ljubomir-W-47.jpg)
Добре нащивене стретнуце у Заводу закончене з квалитетну дискусию о темох и часох о хторих госц бешедовал.