У просторийох КПД „Карпати” у Вербаше 15. априла отримана явна трибина о актуалносцох у науки и култури при Руснацох, о чим бешедовали директор Заводу за културу войводянских Руснацох (ВР) мр Серґей Тамаш, академик Юлиян Тамаш, як и домашнї, предсидатель КПД „Карпати” др Деян Загорянски. На трибини присуствовал и член Општинскей ради Вербас Ґоран Пейович, задлужени за енерґетику и транспорт.
Серґей Тамаш здогаднул на дотерашню роботу, односно програми и проєкти Заводу за културу ВР, дзе, медзи иншим, визначел прекладанє найзначнєйших руских писательох на други язики, видаванє вецей капиталних моноґрафийох з обласци музики, о народних звичайох, облєчиве и танцох.
Академик Тамаш бешедовал о положеню Руснацох у нашей держави, у култури и образованю, а тиж анализовал и Националну стратеґию Руснацох.
Шицки троме бешеднїки ше зложели же того року главни проблем, нє лєм за руску, алє и за шицки други меншини, то финансованє. Кед у питаню локални штредок, о тим бешедовал Загорянски, визначуюци чежки стан у КПД „Карпати”, як и же ище вше нє познате одкаль будзе финансоване традицийне стретнуце хорох. Як гварел, конкуроване на вецей адреси, а одвити ищи нє достати.
З тей нагоди член Општинскей ради Ґоран Пейович обецал же ше Општинска рада будзе намагац пошвидко дац даяки одвити на винєшени проблеми, першенствено на финансованє, як и на енерґетску ефикасносц будинку КПД „Карпати”.
