У просторийох Руского КУД „Др Гавриїл Костельник” у Кули отримана седма схадзка Орґанизацийного одбору за Централну преславу националного швета Руснацох, хтора нарок, 16. януара будзе у Кули.
Зберанє материялох за моноґрафию о Руснацох у Кули при концу, набавени и потребни технїчни материял за подобово вистави (Лидиї Барновей и Амалиї Ковачовей), а на схадзки винєшене же етно-столи за Централну преславу пририхта Здруженє женох „Байка” з Руского Керестура.
З часци бешедоване и о сценоґрафиї за Шветочну академию, а конкретнєйше о єй точкох, та познате же на Академиї буду участвовац рецитаторе з Кули, Мишана шпивацка ґрупа домашнього Руского КУД „Др Гавриїл Костельник”, хтору руководителька Еуфемия Планкош пририхтує вєдно з Юлияном Рамачом Чамом, та Мишани хор керестурского Дому култури.
Надалєй, на Шветочней академиї єдну часц як солистка и у дуету з Агнету Тимко будзе мац и шпивачка и членїца Националного оркестру Лїляна Барна Никитович з Кули, буду участвовац и побиднїки з наших шпивацких фестивалох – солисти Йовґен Надь и Танита Ходак, Дзивоцка шпивацка ґрупа Дому култури Руски Керестур, Хлопска шпивацка ґрупа новосадского РКЦ, а будзе шпивац и Женска шпивацка ґрупа истого центру, окреме наступи и Национални оркестер.
На програмох Централней преслави будзе наглашене и же кулски Руски КУД означує 20-рочнїцу снованя, а у рамикох технїчней потримовки за участвованє у орґанизованю преслави, директор Заводу за културу ВР Серґей Тамаш предсидательови домашнього Дружтва Владимирови Бучкови вчера придал нови лап-топ, як дарунок Заводу. У рамикох тей потримовки члени Мишаней шпивацкей ґрупи „Костельника” достаню и нове народней облєчиво за наступи.
