У просторийох КУД “Др Гавриїл Костельник” у Кули вовторок отримана друга схадзка Орґанизацийного одбору за отримованє святочносци з нагоди Националного швета Руснацох Сербиї, у Кули 2016. року.
На схадзки присуствовали представнїки КУД Др Гавриїл Костельник, директор Заводу за културу войводянских Руснацох мр Серґей Тамаш, подпредсидатель Националного совиту Руснацох Йовґен Мудри, директорка Основней музичней школи у Кули Лїляна Барна Никитович та други заинтересовани дїяче у култури и члени КУД ,,Др Гавриїл Костельник”.
На схадзки було бешеди о написох у вязи зоз потерашнїма означованями святочносци и як поинформовали представителє КУДу и наших националних институцийох, Орґанизацийни одбор отворени за суґестиї хтори можу подзвигнуц уровень святочносци.
Орґанизацийни одбор завжал становиско же ше концепция за наступну святочну академию нє будзе меняц та же би ше така форма означованя запровадзела и у Суботици и Бачинцох. Тиж так, предложене же би ше тот час вихасновал за обдумйованє новей концепциї святочней академиї.
Присутни представителє Основней музичней школи у Кули, директорка Лїляна Барна Никитович и наставнїца Музичней школи Тат’яна Кнежевич прилапели обдумац музични часци потребни за провадзаци активносци як цо отверанє вистави и промоция моноґрафиї.
Александер Мудри поинформовал присутних о снованю редакциї за писанє моноґрафиї Руснаци у Кули, а Владимир Лазор иницировал отримованє шаховского турнира.
Орґанизацийни одбор предложел же би идуца схадзка була 28. юлия на 18.00 годзин у просторийох КУД ,,Др Гавриїл Костельник”. Схадзка будзе отворена за явносц а у роботи Орґанизацийного одбора можу участвовац шицки заинтересовани.
