Вчера, 20. марца, у рамикох Медзинародного сайма кнїжкох у Новим Садзе, отримана промоция руских виданьох НВУ Руске слово и Завода за културу войводянских Руснацох, як и виданя Рускей матки и КПД ДОК.
У фокусу презентациї були кнїжки хтори обявени у другей половки прешлого и початком того року, односно помедзи два сайми у Новим Садзе, а окремни акцент бул на насловох хтори з друку вишли праве пред Саям.
Директор Завода за културу войводянских Руснацох Саша Сабадош представел моноґрафию Мит завичаю у творчосци Михайла Ковача др Ани Римар Симунович о хторей попри авторки бешедовал и єден з рецензентох проф. др Юлиян Тамаш. Моноґрафия вишля у совидавательстве Заводу за културу войводянских Руснацох и Филозофского факултета Универзитету у Новим Садзе як перши наслов у новопорушаней едициї Др Янко Рамач.
НВУ Руске слово и Завод за културу совидавателє и романа Рика Мономах – Aвтобиоґрафски роман Юлияна Тамаша, найновшей кнїжки у Едициї Верхи, о хторей зоз автором бешедовал дакедишнї редактор Видавательней дїялносци Руского слова Микола Шанта.
У предлуженю промоциї хтора отримана на штанду Покраїнского секретарияту за културу, явне информованє и одношеня з вирскима заєднїцами, представени и найновши виданя Руского слова, а потим и публикациї Рускей матки и КПД ДОК.
