Вчера, 6. юния, предсидатель Покраїнскей влади Иґор Мирович зоз символичним одкриваньом табли на уходзе до нового обєкту Завода за културу войводянских Руснацох, урядово отворел нови просториї.
![](https://zavod.rs/wp-content/uploads/2023/06/01.jpg)
Шветочносци присуствовали поволани госци, покраїнска секретарка за културу и информованє Драґана Милошевич, представителє других националних совитох и заводох за културу, дїяче и новинаре.
Як визначел предсидатель Покраїнскей влади Иґор Мирович, обєкт фундамент националного єства, бо ше у нїм злїва цале богатство скарбу, традициї и култури єдного народу. У тим доме сучасни руски творителє, члени Националного совиту, дїяче у култури, як и шицки други буду чувац и пестовац културу и язик, а з тим шицко то будзе видлївше и препозантлївше ширшей явносци – гварел Мирович.
Предсидатель Националного совиту Руснацох, Йоаким Рац, з тей шветочней нагоди гварел же нєшкайши дзень у историї Руснацох будзе виписани зоз златнима букавами. Дзекуюци потримовки Покраїни, як и ресорного Секретарияту, реализовани тот длугорочни проєкт, а обєкт нашого Заводу ше находзи на правим месце, у старей часци Нового Саду.
![](https://zavod.rs/wp-content/uploads/2023/06/02.jpg)
Реализация того проєкта тирвала скоро дзешец роки, од 2015. року и до ньго уложени 26 милиони динари. На скоро двасто квадратних метерох пресцераю ше адекватни условия за дїялносц Заводу, а тиж и за орґанизованє камерних манифестацийох.
Нєшка на 18 годзин будзе отримана програма зоз хтору урядово почнє робота ЗКВР.