На 60. Медзинародним сайме кнїжкох у Беоґрадзе, на штанду Покраїнского секретарияту за културу и явне информованє, штварток, 29. октобра свою рочну видавательну продукцию вєдно представели НВУ „Руске слово” и Завод за културу Войводянских Руснацох.
Завод за културу войводянских Руснацох предствел шейц свойо кнїжки – „Руснаци у Вербаше”, „Вини и зради” Штефана Гудака (преложену на українски), „Польодїлска лексика” Александра Мудрия, „Ґерманизми у руским язику” Андреї Медєши и каталоґ „Шицко то оглашки и реклами” и штироязичне виданє “Центурион-Дзешец любовни заповиди”. О кнїжкох бешедовал директор Заводу Серґей Тамаш, як и авторе.
Штанд Покраїнского секретарияту за културу и явне информованє, односно виданя НВУ „Руске слово” и Заводу за културу Войводянских Руснацох исти дзень пополадню нащивели и школяре и професоре з керестурскей Школи „Петро Кузмяк”.
До конца того року, Завод планує видац моноґрафию о руским облєчиве, обявиц два мастер роботи Саши Сабадоша и Марини Джуджар, и друковац кнїжку фотоґрафийох Даряна Гардия.
