У Заводзе за културу войводянских Руснацох отримана єднодньова едукативна роботня о писаню предкладаньох проєктох, у орґанизациї Заводу и Новинарскей асоцияциї Руснацох (НАР). Роботню тримала Дюрдя Дюкич з Ресурсного центру гражданских инициятивох Беоґрад, хтори од „ТАSCО” орґанизациї пребера улогу едукованя цивилного сектору.
Роботня була интерактивна, а участвовали вецей як 20 млади особи з руских здруженьох, члени НАР-у и поєдинци. Вони дотераз уж здобули перши знаня и схопносци о приступаню ґу писаню проєктох.
Учашнїкох на початку роботнї привитал директор Заводу за културу ВР Серґей Тамаш, наглашуюци же ше з едукациями цивилного сектору предлужи и надалєй, док членїца Управного одбору НАР-у Єлена Перкович визначела же роботня єден з крочайох ґу розвиваню власних капацитетох, цо и предусловиє за уключованє цо векшого числа младих до ришованя проблемох у рускей заєднїци.
