У Културним центре (КЦ) Нового Саду пияток, 20. мая, отримани Концерт Хору „Алпе Адриа” з Удинох, з Италиї, под дириґенством маестра Андреа Тофолиния.
Репертоар хору з Италиї бул подзелєни до трох часцох. У першей шпивал композициї фриуланскей култури и традициї, дзе доминовали любовни теми и поезия, алє и теми о обрабяню жеми и емиґрациї. Друга часц була инспирована з релиґию и молитвами Всевишньому и Дївици Мариї, док у трецей шпивани композициї чий автор Дюзепе Верди.
Хор з Италиї, хтори до рока ма коло 40 концерти у жеми и иножемстве, як и публику привитала Редакторка музичней програми у КЦ Весна Качански, толкуюци же Хор „Алпе Адриа” на поволанку керестурскей парохиї пришол госцовац на нашим Фестивалє хорского шпиваня у Вербаше, док парох керестурски о. Михайло Малацко подзековал орґанизатором на помоци и потримовки у орґанизованю того концерту у Новим Садзе и визначел же уж длугши час постої вяза медзи Каритасом з Удинох и Руского Керестура. Надпомнул же керестурски Мишани хор Катедралней церкви св. о. Миколая и Дому култури з Руского Керестура у Удинох госцовал 2011. року.
Концерт у Клубу „Трибина младих” КЦ провадзели велї Руснаци з Руского Керестура и Нового Саду, як и други, котри шпиванє Хору наградзели з моцнима аплаузами.
Госцованє Хору з Удинох орґанзоване з поримовку Заводу за културу войводянских Руснацох и Националного совиту Руснацох , у Новим Садзе и з помоцу Културного центру и Городу Нови Сад.
