У Заводзе за културу войводянских Руснацох у Новим Садзе 07. октобра, отворена вистава автора Сашу Сабадоша, архивисти, з тему „Приватни живот Руснацох у 19. и початком 20. вику през приватни документи”.
Шицких присутних привитала секретарка Заводу Наташа Мецек, виставу отворел помоцнїк покраїнского секретара за културу Мирослав Илич, а о самей вистави бешедовал єй автор Сашо Сабадош.
Приватни живот Руснацох у Бачкей, Сриме и Славониї у спомнутим чаше представена през седем сеґменти – каждодньови живот, школованє, войско, финансиї, польопривреда, ремеселнїцтво и вирски живот, а прейґ рижних приватних документох, як цо то вояцка кнїжочка, особна леґитимация, свидоцтво з Ґимназиї, та аж и документ о одреканю од державянства Кральовини Сербиї пре одход до Америки.
Як поведзене, дзепоєдни документи шведоча о наших селїдбох, а автор вистави Сабадош подзековал шицким котри дзечнє дали документи и на таки способ збогацели наш историйни и културни скарб.
Виставу провадзи и окремни Каталоґ автора вистави, у рецензиї музейней совитнїци Любици Отич, а у виданю орґанизатора вистави – Заводу за културу войводянских Руснацох.
